BU-pris til Strilalam

Bedrifta Strilalam fekk tildelt Bygdeutviklingsprisen i Hordaland for 2014.

Prisen på 50.000 kroner vert delt ut av Innovasjon Noreg, og juryen peikar på at Strilalam i høgste grad tilfredsstiller kriteria for bygdeutviklingsprisen. Det handlar om lokal matforedling med vekt på å utnytta eigne råvarer, kompetanse og arbeidskraft.

Innovasjon Noreg legg og vekt på at Strilalam lagar kortreist mat av høg kvalitet, at dei har godt økonomisk resultat og jobbar hardt for å byggja opp ei lønsam bedrift.

Strilalam vart starta av seks sauebønder i 2006, og i 2014 bygde dei eige slakteri. Bedrifta leverer ei rekkje lammeprodukt til hotell, restaurantar og private.